Nivaala by Anjali Mishra and Bazela Hawa

Zindagi e zulm kitne ghav tune hai diye
Ghav jitne bhi diye ho hum saare Seh liye
Kabhi ghol Kar garmi ki shikanji mein
Toh Kabhi sard ki garam daal me bhigo Kar
Jitne ghav the, hum saare nigal liye.
Diye bhi toh usse Jo pehle se tha haara hua
Rooh jiski zaleel thi, jism jiska kaanpa hua
Khamoshi me dafan Kar humein naa jaane kitne hisso me baata
-
Kisi ki beti ko bhoj samajh Kar toh kisi ki paidaish me khot samajh kar
Tumne humein Zindagi ke har maqaam par roka
Ghav toh ab bhi the khule jinpar tumne apna adhikar samajh, thoda aur namak daala
Kabhi dhutkaar, Kabhi laathi, toh Kabhi bhooka maar daala.
Ghav jitne bhi diye ho hum saare Seh liye

Khamoshi me dafan Kar humein naa jaane kitne hisso me baata
Tu ladki hai Tu hijda hai tu musalmaan hai Tu pichda hai
Tu napaak Tu najayaz Tu aatank hai Tu achhoot hai
Inn alfaazon ke ghav hum jaise taise nigal liye.
Diye bhi toh Tumne usse, Jo pehle se tha haara hua.
Ghaav jitne bhi diye ho hum saare seh liye